ده أول سؤال بتسأله من المغاربة بمجرد ما بتكلم، بيخمنوا من اللهجة اني مصري، وبيسألوا مباشرة: أهلاوي ولا زملكاوي؟!!
طبعا الإجابة بتنعكس على وش السائل، لكنه مش بياخد موقف أو ينسحب، إلا بنسبة ضئيلة جدا جدا
بعد تكرار ونمطية السؤال استغربت من تعصب المشجعين في المغرب، كنت متوقع إن حدة الشحن والتعصب بين جمهور الأندية مش موجود بشكل كبير إلا في دول قليلة، ولأهداف معينة.. لكن جمهور المغرب فاجئني الحقيقة
لأنهم مش فقط متعصبين بشدة لكن كمان لأن كتير من اللي سألتهم بتشجعوا مين وقالوا أندية تانية غير الوداد، أكدوا أنهم هيشجعوا الأهلي ضد الوداد ومش هيشجعوا ممثل المغرب
السبب ممكن تكون تساوي رصيد الناديين الكبيرين الرجاء البيضاوي والوداد المغربي، وكلا الفريقين ينتميان للعاصمة الاقتصادية للمغرب كازابلانكا أو الدار البيضاء، ، وكل فريق معاه ٣ بطولات قارية.
نظرية ادلر في علم النفس بتفسر الظاهرة دي، فغالبا رغبة الجمهور بعدم تفوق الوداد على الرجاء، أو باقي الأندية هي الدافع الأساسي لعدم تشجيع الوداد الممثل الوطني لدولتهم..
الغريب بقى كان سؤال شاب ليا: مين افضل جمهور الوداد ولا الرجاء!! رغم إن الناديين بينتموا لنفس المدينة، إلا أن المنافسة بينهم على أشدها حتى على مستوى أخلاق الجمهور!!
بعيدا عن المباراة الأهلي خسر نسخة السنة الماضية أمام الوداد في ملعب محمد الخامس في الدار البيضاء، ونتمنى حظنا السنة دي يكون أفضل والأهلي يحقق النجمة ١١، ويا ريت مشجعي كل الأندية يلتفوا حول الممثل الوطني المصري (الأهلي)..
