محمد شبانة لنجيب ساويرس: “ممكن أسيب الصحفيين عليك يهاجموك”.. و”البلشي” يرد: “لسنا قطيع غنم هتطلقنا على الناس اللي مضايقة أصحابك”
في رد فعل له على التصريحات، التي أدلى بها محمد شبانة، سكرتير عام نقابة الصحفيين، خلال برنامجه، الذي يقدمه على إحدى القنوات الفضائية، انتقد خالد البلشي، وكيل نقابة الصحفيين الأسبق تصريحات شبانة، قائلا عبر منشور له على صفحته على الفيس بوك: “الأستاذ شبانة اللي هو أمين عام نقابة الصحفيين، ونائب في البرلمان طالع على الهوا في الفيديو الموجود في أول تعليق، بيهاجم نجيب ساويرس، ودا حق الأستاذ شبانه، وكمان جزء من أدوار الصحافة في مواجهة الأخطاء الحقيقية، وليس الآراء لو عندنا صحافة.. بس الأستاذ شبانة وهو بيهاجم نجيب ساويرس بيقوله أنا ممكن أسيب الصحفيين عليك يهاجموك.. باعتبارنا قطيع غنم هيطلقنا على الناس اللي مضايقته وكمان مضايقين أصحابه (هنا هاني شاكر على حد قوله) وقت ما يحب”.
وتابع البلشي: “الأهم بقى الأستاذ شبانة اللي هو صحفي، وكمان نائب بيقول لنجيب ساويرس إنه عنده وقائع مخالفات، وتزوير وساكت عليه عشان أصحابه اللي بيشتغلوا وعشان الناس تاكل عيش.. دا منطق أمين عام الصحفيين ونائب الشيوخ .. طبعا الأستاذ شبانة بيقول إن اللي حركه وسبب كلامه عن نجيب هو تصريحاته بتاع مطربي المهرجانات وإن نجيب ساندهم ضد تصريحات هاني شاكر.. وبغض النظر عن إن دا السبب الحقيقي ولا السبب تصريحات تانية لنجيب عن الاقتصاد.. وبغض النظر عن إن نجيب جزء من رأسمالية فاسدة.. بس المنطق اللي الاستاذ شبانة بيتكلم بيه هو منطق فاسد، وهو (أفسد وأنت ساكت وإحنا هنسكت عليك).. سيب واحنا هنسيب وكل واحد يفسد في منطقته وهو ساكت، وساعتها يا دار ما دخلك شر وخلي المراكب تمشي وهتفضل واكلين شاربين مع بعض.. أما لو اتكلمت هنطلق عليك الناس بتوعنا يتكلموا..
ووصف البلشي عبر مشوره، تصريحات شبانة بالفساد المهني، مطالبا بمحاسبته نقابيا، ومهنيا، ونيابيا، قانونيا، مبررا مطلبه، بعلم شبانة بجريمة تضر الدولة، دون التحرك للإبلاغ عنها، بنية حماية أصحابه المشاركين فيها.
واختتم البلشي منشوره قائلا: “الرسالة بتاع الأستاذ شبانة ” يا أستاذ نجيب عندنا مخالفاتك فعيش بقى بس لو فتحت بقك هنقطعقك ونجيب الناس بتوعنا يقطعوك “.. ولأني عارف أن الأستاذ شبانه جزء من مناخ إعلامي كلنا عارفينه، ولأني عارف أن محدش هيتحرك يحاسب الأستاذ شبانه.. لكن أبسط حاجة أني أطالب نقابتنا المجيدة تحاسب أمينها العام على غلطه في حق الصحفيين، وتصويرهم كقطيع ممكن يحركه ضد أي حد، وعلى إخلاله بواجباته المهنية عشان خاطر أصحابه يأكلوا عيش على حد تعبيره”.
