استكمالًا لتصريحاتها خلال جلسة النقاش بمهرجان الجونة السينمائي حول السينما والأمن الغذائي، تحدثت النجمة ليلى علوي عن أهمية دور الفن السابع في التوعية المجتمعية، مؤكدة أن السينما يمكن أن تسهم في نشر الوعي بقضايا الغذاء والاستهلاك المسؤول، إذا توافرت الإرادة والدعم الإنتاجي الكافي.
وقالت ليلى علوي: السينما قادرة على تقديم رسائل مؤثرة وتُحدث تغييرًا إيجابيًا حقيقيًا، لكن لازم يكون في دعم من جهات إنتاجية مهتمة بالتوعية، إلى جانب تعاون اقتصادي وسياسي وإعلامي، لأن القضية دي مش مسئولية الفن وحده”.
وأضافت: السوشيال ميديا النهاردة ليها تأثير قوي، لكن لازم نستغلها في نشر الوعي مش بس الترفيه، إحنا في الشرق الأوسط عندنا مشكلة كبيرة في إهدار الطعام، ولازم نبدأ التغيير من كل بيت. والدتي الله يرحمها كانت دايمًا تقول: مافيش أكل يترمي، لازم نعرف إزاي نستفيد منه بطريقة صحية”.
وتابعت الفنانة: في أوروبا بدأوا يتعاملوا مع فكرة الترشيد بجدية، وبيشتروا كميات صغيرة من الأكل حسب الحاجة. إحنا كمان لازم نتعلم ده ونركز على التوعية الغذائية، لأن الأجيال الجديدة ما عندهاش إدراك كافي عن أهمية الأكل الصحي وكيفية التعامل مع الطعام”.
كما أشارت إلى أن بعض الممارسات اليومية الخاطئة قد تضر بالصحة دون وعي، موضحة: في حاجات بسيطة الناس لازم تعرفها، زي إن الأرز لما يتحط في التلاجة ويتسخن تاني ممكن يبقى فيه بكتيريا ضارة جدًا، الحاجات الصغيرة دي محتاجة توعية عامة”.
واختتمت ليلى علوي حديثها بالتأكيد على أهمية نشر ثقافة الوعي الغذائي من خلال الفن والإعلام، قائلة: “الموضوع مش رفاهية، دي مسئولية تجاه نفسنا وتجاه المجتمع كله. لو بدأنا من هنا في مهرجان الجونة، نقدر نوصل رسالة حقيقية للعالم عن أهمية الغذاء الآمن والاستهلاك المسؤول”.
